Rreth nesh
Qendra kulturore Vatra është pjesë e shoqatës Albabel e themeluar në Belgjikë që në 2007-tën nga Amet Gjanaj.
Qendra kulturore Vatra ka si qëllim që të promovojë kulturën shqiptare si për pjesëtarët e komunitetit shqiptar ashtu dhe për belgët dhe komunitetet e tjera në Belgjikë.
Për të arritur këtë qëllim, Vatra organizon aktivitete të ndryshme si në lokalet e veta ashtu, në lokalet e komunës Molenbeek dhe në vende publike.
Mund të veçojmë 4 përmasa të rëndësishme të Vatrës :
-
Shkolla Vatra: Organizimi i mësimit plotësues në gjuhën shqipe për fëmijtë shqiptarë nga 6 deri 17 vjeç;
-
Grupi i valleve Vatra: Edukimi i adoleshtëve shqiptarë me vallet tradicionale të të gjitha trevave;
-
Grupi i grave Vatra: emancipimi i grave shqiptare me aktivitete kulturore si dhe mësimin e gjuhës frëngjishte dhe integrimin në shoqërinë belge;
-
Pjesëmarrja dhe organizime të ndryshme kulturore: koncertesh, shfaqjesh, mbledhjesh, konferencash, debatesh, manifestimesh, panairesh, promovim librash, etj.
Vatra bashkpunon me një sërë shoqatash shqiptare dhe belge dhe ka një partneritet me Rrjetin e bizneseve shqiptare në Beneluks që kontribuon gjithashtu në mbarëvajten e këtyre aktiviteteve.
Vatra punon ngushtë dhe me ambasadat e Shqipërisë dhe Kosovës.
Vatra financohet nga Komisioni i Komunitetit Francez të Belgjikës.
Shkolla shqipe me mësim plotësues
Synimet e kësaj shkolle:
Shkolla me mësim plotësues në gjuhën shqipe ka si qëllim që t’u jap mundësi prindërve me origjinë shqiptare të pajisin fëmijët e tyre me elementet karekteristike të kulturës shqiptare: gjuhë, histori, gjeografi, këngë, muzikë e valle shqipe.
Prindërit sado me vullnet të mirë në këtë drejtim nuk mund t’i përgjigjen individualisht ashtu siç duhet sfidës së ruajtjes së trashëgimisë kulturore në kushtet e mërgimit.
Mësimet plotësuese në gjuhën shqipe nuk përbëjnë ndonjë rrezik për ecurinë normale të shkollimit të nxënësve në shkollat belge.
Përkundrazi, integrimi i tyre në shoqërinë belge nuk mund të konsiderohet frytdhënës veçse përmes një njohje më të madhe të kulturës së origjinës dhe organizimin e aktiviteteve kulturore të hapura ndaj të tjerëve.
Prandaj shkolla shqipe me mësim plotësues ka vënë disa parime në funksion:
-
Shkolla me mësim plotësues në gjuhen shqipe jep mësimet mbi bazen e planeve e të programeve të miratuara nga Ministritë e arsimit në Tiranë e Prishtinë në përshtatje me veçoritë e kësaj shkolle;
-
Mësimet jepen në përputhje me kërkesat e deshirat e nxënësve dhe të prindërve shqiptarë që jetojnë në Belgjikë;
-
Mësimdhënësit janë profesionistë me përvojë në fushën e arsimit;
-
Shkolla drejtohet nga specialistë të ndryshëm që kujdesen për mbarëvajtjen e organizimin e mësimeve;
-
Nxënësit janë të ndarë në grupe të ndryshme në bazë të njohurive përkatëse;
-
Materiali mësimor është i cilësisë së parë dhe përputhëshmëria e tij me nivelet e ndryshme të nxënësve sigurohet në mënyrë shumë profesionale.
Në fund të vitit shkollor nxënësit pajisen me çertifikata që njihen nga Ministritë përkatëse në Tiranë e Prishtinë.
Shkolla me mësim plotësues në gjuhën shqipe zhvillon aktivitetet e saj në lokalet e shkollës fillore komunale numër 13 falë mbështetjës së Kryetarës së Komunës së Molenbeek-ut, znj. Catherine MOUREAUX.
Kush mund të regjistrohet ?
Cdo fëmijë shqipëtarë prej moshës 6 vjeçare deri në moshën 17 vjeçare mund të regjistrohet për t’u inkuadruar në programin shkollor të shkollës me mësim plotësues në gjuhën shqipe.
Si bëhet regjistrimi ?
Regjistrimi bëhet duke na kontaktuar në adresen e-mail ose në numrin e telefonit që vijon ose duke u paraqitur drejtpërsëdrejti, në vend, në kohen e mësimeve.
Kur zhvillohen mësimet ?
Mësimet zhvillohen çdo të shtunë nga ora 09.45 deri në 13.45.
Grupi i këngëve dhe i valleve shqipe:
Cdo ditë mësimi, nxënësit ndjekin një orë folklor shqipëtar ku këndojnë dhe vallëzojnë të inkuadruar nga mësues profesionistë.
Nxënësit më të talentuar do të inkuadrohen në grupin folklorik të shkollës për të marrë pjesë në festivalet dhe festat e organizuara në komunitetin shqiptar.
Grupi i valleve Vatra
Komuniteti shqiptar i Belgjikës është vërtet i përkushtuar të promovojë traditat e tij origjinale dhe të tregojë pasurinë e folklorit të tij si atë të Shqipërisë ashtu dhe atë të Kosovës, Iliridës, Malësisë, Luginës së Preshevës dhe Çamëria bashkë me veshjet karakteristike, muzikën dhe këngët përkatëse.
Kultura jonë nuk njihet mirë për shkak të izolimit që pësoi populli shqiptar gjatë 50 viteve të diktaturës komuniste në Shqipëri dhe shtypjes apo edhe masakrave të përjetuara nga shqiptarët në pjesët e tjera në trojet shqiptare të përmendura më sipër. Mësimet zhvillohen çdo javë kryesisht në ambientet e Shtëpisë së kulturave të Molenbeek.
Rregullisht, organizohen aktivitete në ambjente të mbyllura apo në dritë të diellit për të nxjerrë në pah arritjet që marrin adoleshentët me origjinë shqiptare në këto mësime vallëzimi. Grupi shpesh merr pjesë në aktivitete të organizuara nga autoritetet e disa komunave të Brukselit ose në koncerte private.
Grupi i grave Vatra
Në kuadër të Qendrës Vatra është menduar që të lançohet dhe një repart i veçant për gratë duke pasur parasysh se gratë janë burimi i shumë aktiviteteve në Belgjikë.
Janë gratë shqiptare që, ndër vite, kanë aktivizuar më së shumti pjesën kulturore brenda komunitetit shqiptar në Belgjikë bashkë me mësimin plotësues në gjuhën shqipe.
Duke pasur parasysh potentialin dhe rëndësinë që kanë gratë shqiptare për komunitetin shqiptar në Belgjikë, është lançuar iniciativa e krijimit të grupit në shtator të vitit 2014.
Ky grup zhvillon kurse të gjuhës frënge dhe integrimi në shoqërinë belge. Ai mbështetë të gjitha aktivitetet e Qendrës kulturore Vatra dhe të shkollës shqipe. Rregullisht grupi organizon mbrëmje familjare dhe për gratë shumë të suksesshme.