Pasqyrimi i masakrave dhe krimeve të tjera nga lufta e fundit në Kosovë përmes fotografisë

Sot te Qendra kulturore Vatra u mbajt një ekspozitë fotografish të masakrave serbe në Kosovë në luftën e fundit në Kosovë 1998/99 dhe të një pjesë të mbetjeve mortore të civilëve të masakruar nga ushtria dhe paraushtarakët serbë të gjetur në varrezat e ndryshme masive të hapura nga ata në përpjekjen e tyre për të fshirë gjurmët e gjenocidit të kryer në Kosovë.

Kjo ekspozitë është organizuar nga Organizata For New Life Kosovo në kuadër të projektit “Pasqyrimi i masakrave dhe krimeve të tjera nga lufta e fundit në Kosovë përmes fotografisë“, të mbështetur nga Miinistria e jashtme dhe të Diasporës së Kosovës në prani të Ambasadorit të Kosovës z. Agron Bajrami, të pjesëtarë të Komisionit , me pjesëtarë të Këshillit Koordinues të Asociacioneve Familjare të të Zhdukurve të Kosovës, të Komisionit Qeveritar për Persona të Zhdukur, të Institutit të Mjeksisë Ligjore me në krye Mjeku ligjor Arsim Gërxhaliut dhe familjarë të disa personave të masakruar e të zhdukur që janë ende rreth 1600 veta.

Qëllimi i ekspozitës është sensibilizimi i opinionit ndërkombëtarë e Shqiptarë nëpër botë për çështjen e të zhdukurve me dhunë gjatë luftës në Kosovë dhe të masakrave.

Pata kënaqësinë të takohësha me mjekun ligjor Arsim Gërxhaliun që ka dhënë një kontribut të pakrahasuar për analizën dhe identifikimin e mbetjeve mortore nëpër varrezat kolektive të ndryshme dhe që është bashkvendas i imi, familja e të cilit është larguar nga Bicaj i Kukësit përpara 300 vjetësh.

Ekspozita ndodhet ende nesër e dielë 3 nëntor nga ora 10:00 deri në orën 16:00.

I pavdekur qoftë kujtimi i të gjithë të masakruarve dhe dëshmorëve të kombit!